Koalizioak ohar batean nabarmendu duenez, «baztandarrek behin eta berriz agertu dute makro proiektu honen kontra daudela», eta gogorarazi du «egindako kontsultan boto gehienak proiektu honen kontrakoak izan zirela».
Ildo horretan, Adolfo Araiz parlamentarioak nabarmendu du ez dela betetzen ari «Nafarroako Kontratu Publikoen Administrazio Auzitegiaren uztailaren 23ko 64/2019 Akordioa, esleipen-prozedurarekin segitzea ezinezkoa dela adierazten zuena».
«Nahiz eta Administrazio Auzitegiak erabaki hori hartu, beharrezko zuzenketak egin eta proiektua urbanizatzeko lehen faseko obren plegua doitu beharrean, Aroztegiko proiektua bultzatzen duen enpresak legez kanpokotasunari, egitatezko bideari eta berezkoa duen nagusitasunari eustea erabaki du, eta obrei hasiera eman die», kritikatu du.
Horregatik, Araizek hainbat galdera erregistratu ditu Nafarroako Parlamentuan. Hala, Nafarroako Gobernuak zer neurri hartuko dituen galdetu du, Batzordearen jarduera legezkoa izan dadin, eta ea obra honen hasiera Lurralde eta Paisaia Zerbitzuari jakinarazi zaion.
Gisa berean, galdetu du ea Nafarroako Gobernuak «obrak legez kanpo hasteagatik zehapen espedienteren bat irekitzea» aurreikusita duen eta ea errekerimenduren bat eginen duen Foruzaingoaren bidez «Konpentsazio Batzordeak eta obra horiek legez kanpo egiten ari den enpresak obra horiek berehala geldiarazteko».