Erabakian horretan galdeketa egin ahal izateko egoki ikusten den eragileekin biltzea ere onartu dute eta Baztango herri-lurrei buruz erabakitzeko eskubidearen defentsa sendoa egitea. Erabakiaren alde 27 batzarkidek egin dute; Almandozko alkatea abstenitu da eta Navarra Sumak bozketan ez parte hartzea erabaki du.
Eztabaida sozial handiko afera
Baztangoiza, Elizondo, Erberea eta Basaburuko batzarkideek aurkeztutako idatzian afera honek aurten egin duen bidearen laburpen bat egin dute. Honela, urtarrilaren 25ean Rouiller talde multinazionalarena den Magna enpresak Baztango Batzar Nagusiko kideen aitzinean meategiaren egitasmoa aurkeztu zuen, bereziki bazken inguruan zuen proposamena. Ondotik, otsailaren 25eko osoko bilkuran, Baztango udalbatzak Magnaren eskari berriaz erabakia hartu zuen, Magna laguntzeko nekazariekin egin nahi duen bileraren antolaketan.
Aitzinetik, orain hamar urte inguru, eztabaida sozial handia izan zen Baztanen Erdizko herri-bazkalekuan Magnak egin nahi zuen meategiaren egitasmoari buruz.
Horiek denak ikusita, Erdizkoak herri-bazkalekuak direla eta gaiak baztandarren artean pizten duen kezka bizia modu demokratiko eta gardenean kudeatu ahal izateko, ibilbide-orria finkatzea beharrezkoa da eta, hori, Baztango herri-lurren kudeatzailea den heinean, Baztango Batzar Nagusiari dagokio.
Horrela, ibilbide-orriaren norabidea, proiektuari buruzko herri-galdeketa loteslea behar luke izan izan. Eta horren arabera informazio eta eztabaida sozialerako egitaraua antolatu beharko litzateke. Baztango Batzar Nagusiaren gidaritzapean eragileei parte hartzeko aukera eskaini nahi zaie.