Aste Santuko turisten etorrerarako neurriak adostu dituzte Erratzuko Herriak eta Baztango Udalak

Ttipi-Ttapa 2021ko mar. 26a, 20:00
Deskargatu Info Ahotsak :
Español English Français Català Galego

Bisitari aunitz bildu zen iaz Xorroxin ur-jauzian.

Aste Santuan Erratzun eta Xorroxingo ur-jauzian biltzen den turista kopurua kontuan hartuz, eta iazko udan egoerak «gainezka» egin zuela ikusita, ondoko egun hauetarako Baztango Udalak eta Erratzuko Herriak hainbat neurri hartuko dituzte.

Trafikoa erregulatu eta seinaleak egokitu

Hasteko, trafikoa erregulatzeko hiru kontratazio eginen dituzte eta, horren ondorioz, turisten autoak arrazoirik gabe herrian ez dira sartzen ahalko. Modu berean, Gorostapolo eta Iñarbilera ere turisten autoak ez dira joaten ahalko; autoak herriko sarreran dagoen Ubidea etorbidean utziko beharko dituzte. Horrez gain, egun horietarako errepideetako zutikako seinaleak egokituko dira eta prestatuko dira, pentsatutako neurri horiek bete ahal izateko. Kontratatutako langileak goiz eta arratsaldez arituko dira, ortzegunetik hasita eta Foruzaingoaren babesa izanen dute.

Udarako erreserba-plataforma eta azpiegitura berriak

Betiere, Aste Santuko neurri hauek behi-behinekoak dira, udarako erreserba-plataforma eta azpiegitura berriak eginak eduki nahi baitira.

Aste Santuko ordutegiak

Aste Santuko egunetan Elizondoko turismo bulegoa 09:30etik 19:00etarat irekirik egonen da, egunero. Eta Amaiurko informazio gunea 11:00etatik 13:30erat eta 16:00etatik 18:30erat.

 

 

Gizartea Baztan

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun

Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!