Joan den azaroan Jorge Riechmannek urteroko Landa Begiradak jardunaldien barnean eman behar zuen solasaldia koronabirusagatik bertan behera gelditu zen. Mintzaldi hori bera martxoaren 27an, heldu den larunbatean, izanen da. Hasieran Elizondoko Arizkunenea kultur etxean iragarria bazegoen ere, gaur egungo bertako edukiera (50 lagun) eskariekin betea zegoenez, Iruritako Damaso Zabalza Gizarte Bilgunera aldatu dute, hemen 71 lagun sartzen baitura. 18:30ean hasiko da.
Klima larrialdia eta krisi ekosoziala solasgai
Filosofoa, matematikaria, saiogilea eta itzultzailea, ekologista eta Madrilgo Unibertsitate Autonomoko Moralaren Filosofiako irakaslea den Riechmannek bere azken liburua, Otro fin del mundo es posible, aurkeztuko du. Hortik tiraka, klima larrialdi eta krisi ekosozial aldirako balioak izanen ditu solasgai. Covid-19agatik edukiera mugatua izanen da eta sarrerako erreserba aitzinetik egin beharko da kultur etxean bertan.