40.000 euroko aurrekontua du Baztango Udalak euskararen sustapenerako

Ttipi-Ttapa 2021ko mar. 23a, 17:00

Euskara Sailak Baztanen euskararen normalizazioa aitzinera egiteko 2021 urterako plangintza osatu du. Tokiko Gobernu Batzordeak aurreikusitako programa onartzea erabaki du.

Euskararen erabilpena sustatzeko programaren zenbait jarduera bertze toki entitate batzuekin elkarlanean egitea proposatu du Euskara Sailak. Onartutako 40.000 euroko aurrekontuaren barnean, 18.500 euro haur eta gaztetxoen aisialdian euskara sustatzeko erabiliko dira. Udako jostaldiak, bertsolaritza irakaskuntzak eta EusLider proiektuak izanen dira diru gehien jasoko dituztenak.

Helduen euskararen erabilera eta sustapenak 12.300 euroko aurrekontua jasoko du. Solaslagun egitasmoari eskainiko zaio gehiena, baita ahalduntzeko solasaldi eta tailerri eta euskara zero-ostalaritzari. Euskararen sustapenari merkataritzan 1.000 euro esleitu zaizkio. Gainerako 8.200 euroak bertzelako sailei emanen zaie, bertzeak bertze, Euskaraldia, bideo ekoizpena, Etxepare saria, kale neurketa eta udaleko langileen euskalduntzea.

Solaslaguna

Solaslagun mintzapraktika egitasmoaren helburua euskaraz aritzea da. Talde ttikietan elkartzen dira parte hartzaileak astero, gutienez ordu bateko tartea eskaintzeko euskaraz solas egiteari. Bi rol nagusi daude talde hauen barnean; bidelariak eta bidelagunak. Bidelariak euskara praktikatzeko beharra duten pertsonak dira; konfiantzazko talde ttikietan lotsa galtzea eta euskaraz mintzatzeko ohitura hartzea dute helburu. Bidelagunak euskaraz ongi aritzen diren pertsonak dira, bidelariei laguntzen dietenak.

Diru kopuru handiena jasoko duen programa da hau, 7.700 euroko diru-laguntza jasoko baitu 2021ean Baztanen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun