Horiek horrela, Nafarroako Gobernuko Lurralde Kohesioko kontseilariak, Bernardo Zirizak, tunelen bikoizketa lanak aurten hasteko milioi erdi euro baino gehiago aurreikusiak dituela adierazi zuen atzo Parlamentuko lan-batzordean. «Milioi erdi euro baino gehiago ditugu aurten bi tunelen obrak hasteko eta beste ehun milioi euro hurrengo urteetarako».
Bi tunel hauek arazo larriak dituzte Europako txostenaren arabera. Sute edo istripu larri bat gertatuz gero, tunel hauek ez dute larrialdi-irteerarik, ezta aireztapen egokirik ere. Horregatik, «arrisku handiko» tunelak direla kontsideratzen dute europar agintariek. Istripuez gain, aski ezaguna da azken urteotan maiz itxi behar izan dituztela konponketa lanak egiteko.
Bi tunelak Europa barneko garraio-sarearen zati dira eta, gaur gaurkoz, errei bakarra dute noranzko bakoitzean. Belatekoak ia 3 kilometro ditu (2,98 km), eta Almandozkoak, berriz, 1,23 kilometro.