Irurita eta Arizkungo alkateak aukeratu gabe daude oraindik
Abenduko hirugarren igandean alkateak izendatzeko batzarrak egiten dituzte Baztango herri guztietan. 15 herrietatik 11tan hautatu zituzten alkateak egun horretan: Berroetan, Arraiozen eta Gartzainen Carlos Garaikoetxeak, Joxelu Retegik eta Fernando Arraztoak segituko dute; eta Elbeten Imanol Juanikotena, Erratzun Kaiet Itoizek, Oronoz-Mugairin Jorge Oteizak, Zigan Joxean Etxeberriak, Almandozen Pello Sarrateak, Azpilkuetan Aitor Iturraldek, Anizen Kristina Fernandezek eta Lekarozen Ernesto Pratek hartu zuten kargua.
Elizondon, Arizkunen, Iruritan eta Amaiurren karguak hutsik gelditu ziren. Ordenantzetan markatutakoa betez, lau herri horiek bigarren aukera bat izan zuten Errege Eguneko batzarrean. Egun horretan hautatu zuten Amaiurko alkate, Ixabel Alemanek kargua hartzeko borondatea agertuta.
Gerora, Elizondon Aitor Bazterrikak bere burua aurkeztu eta bera hautatu zuten alkate ilbeltzaren 16ko batzarrean.
Orain, Amaiurko eta Elizondoko alkateak hautatu ondotik, Iruritako eta Arizkungo alkateak gelditzen dira hautatu gabe. Lerro hauek idazterakoan Irurita eta Arizkunen ez zen inor aurkeztua eta urtarrileko lehenbiziko igandeko batzarretik hilabeteko epea zuen Batzar Nagusiko batzar buruak herri horietan batzarra deitzeko. Ondotik, hautagairik aurkeztuko ez balitz, ordenantzak zehazten ez duen aldia ireki beharko lukete eta prest legokeen norbait agertzerakoan batzarra deitu ahalko litzateke.