Covid-19aren eraginez espero baino lehenago akitu behar izan zuten joan den urteko martxoan 2019-2020 denboraldia Baztango BKT eskubaloi taldeko emakumeek. Aurten, bazirudien ez zutela berriz ere kantxara itzultzeko aukerarik izanen, baina orain, senior mailako taldeak ligari ekinen dio, Izaskun Danboriena jokalari ohia entrenatzaile dutela. Lehenbiziko partida ilbeltzaren 23an, larunbatean 19:00etan jokatuko dute Anaitasunaren kontra, Iruñeko Anaitasuna kiroldegian. Maskarak erabiliz aritu beharko dute.
Momentuz, senior mailako taldea bakarrik hasiko da lehian. Sei talde ariko dira beraien kategorian eta bi itzuli eginen dituzte. Oraingoz, zaleek kiroldegietan sartzeko aukera izanen dute, gehieneko edukiera errespetatuz. Aitzinera begira, badirudi Nafarroako Kirol Jolasetan kategoria ttikiagoetako taldeek ere jokatzeko aukera izan dezaketela.
ESKUBALOIA
Nafarroako emakumeak seniorrak
Anaitasuna – Baztango BKT, larunbatean 19:00etan Iruñeko Anaitasunan.
