Miren Gorrotxategik 2019ko (H)ilbeltza bekarekin idatzitako ‘Sotoan gordeak’ aurkeztu du

Miren Gorrotxategi idazle azpeitiarra, berriki argitaratutako 'Sotoan gordeak' eleberriarekin.

(H)ilbeltza bekari esker argitaratu du idazle azpeitiarrak nobela beltza, Txalaparta argitaletxearekin

Miren Gorrotxategi idazle azpeitiarrak 2019ko (H)ilbeltza bekari esker idatzi duen Sotoan gordeak nobela beltza aurkeztu zuen joan den ortzegunean Donostian. (H)ilbeltza elkarteak, Baztango Udalak eta Txalaparta argitaletxeak antolatzen duten Euskal Nobela Beltza sustatzeko beka irabazi zuen Gorrotxategik, eta horri esker urte bateko epea izan du lana bukatzeko. Berez, egun hauetan Baztanen ospatzekoa zen Euskal Nobela Beltzaren Astearen baitan egin behar zuen aurkezpena, baina jakina da aurten ez dela aitzineko urteetako egitaraurik izanen. Hortaz, Baztanen, otsailean eginen du aurkezpena, ziur aski.

Sotoan gordeak Gorrotxategiren bigarren eleberria da, lehenbizikoa, 33 ezkil (Elkar), 2017an argitaratu zuen Agustin Zubikarai bekari esker, eta Imanol Rayo zinema zuzendariak duela hilabete batzuk argitaratu zuen istorio horretan oinarritutako Hil kanpaiak filma.

Sinopsia

Bigarren argitalpen honetako istorioa Bilbo eta Vianan artean gertatzen da. Gorrotxategik azaldu duenez, nobelak Nora eta Alex ditu protagonista nagusi. Bikotea Bilboko Guggenheim museoan erakusketa bat ikusten ari da Norak bertze garai bat gogorarazten dion zerbait ikusten duenean, eta Alexek zer gertatzen den galdetzen badio ere, Norak ez dio erantzuten. Egun berean Norak aitaren heriotzaren berria jasoko du, eta bikotea Noraren sorterrira, Vianara joanen da. Han, Alex Noraren iragana ikertzen hasten da, bere sekretuak zeintzuk diren jakin nahian. Han egiten du eztanda istorioak. 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun