Hasteko, Iker Araguas kartzelaren barruko esperientziaz mintzatu zen, euskal preso politikoa izateagatik pairatu behar izan zituen tortura, dispertsio eta errepresioaren inguruko hainbat xehetasunen berri emanez.
Araguasekin batera Xochitl Karasatorrek ere dispertsio eta errepresioaz jardun zuen. Karasatorre, motxiladun ume gisa, Frantziako eta Espainiako estatuen arteko espetxe zigorren sinkronizazio ezaz eta honek presoaren zein haren familiaren gainean duen eraginaz eta eskubide urraketez aritu zen.
Horretaz gain, Covid-19a prebenitzeko osasun-agintariek ezarri dituzten neurrien ondorioz presoek eta senide zein lagunek jasaten duten «egoera ankerraz» mintzatu zen. Karasatorreren kasuan erraterako, konfinamendua hasi zenetik uda arte ezin izan zuen aita bisitatu. Gainera, aita bisitatu ahal izan duten aukera guti horietan familia zein lagunek pairatu duten «kezka eta urduritasuna» adierazi zituen, egoeraren aitzinean espetxek hartu dituzten neurri eta baldintza «eskasak» direla salatuz.
Karasatorre eta Araguasek Covid-19a baino lehen eta ondoren ere «euskal preso politiko eta senideek jasaten dituzten kalte fisiko eta psikologikoak» azpimarratu zituzten; erraterako: «familiak eta lagunek egin behar dituzten bidaiek suposatzen duten neke eta inpotentziaz, ondorio ekonomikoez eta kilometro luzeek dakarten arrisku eta biktimez». Hala ere, «presoarekiko maitasuna eta herriarengandik jasotzen duten babesa» nabarmendu zuten.
Tailerrari bukaera emateko azken mintzagaia estrategia aldaketa eta etorkizunaren planteamendura izan zen. Honen harirat Mikel Mundiñanok momentua hitza azpimarratu zuen; uneko errealitatea zein den adierazteaz gain, «momentuak zerbait mugitzen ari dela erakusten baitu». Adierazi zuenez «jendearen borondateak eraman du bide demokratikoetara eta herri honen bake iraunkor horretara abiatzeko gauden momentuko egoerara».
Hurrengo elkarretaratzeak
Bertzalde, hurrengo egunetan mobilizazioak eginen direla iragartzeko aprobetxatu zuten parada. Lehena abenduaren 31n, 12:00etan, Elizondoko plazan elkarretaratzea eginen da. Bigarrenari dagokionez, aurten Covid-19 a dela eta urte hasieran Bilbo eta Baionan egitekoak ziren manifestazioak herrietara bideratu dituzte. Baztanen, Euskal Herriko gainerako herri eta auzoetan bezala, urtarrilaren 9an 17:30ean, Elizondo eta Erratzun bilduko dira preso eta iheslarien etxeratze prozesu eta elkarbizitza eta bakearen alde.