FORMULA: Transferentzia arrunten banaketa egiteko, alde batetik udalen beharrak kalkulatzen dira, bertzetik udalen ahalmen fiskala eta, azkenik, biak gurutzatu emaitza erdiesteko.
Baztango udal agintariak jabetzen dira «Nafarroako aniztasuna kontuan hartuko duen lege eta formula borobila finkatzea seguru aski ezinezkoa dela, eta, hain segur, udal guztiek arranguraren bat» izanen dutela.
Alta, Baztango Udalaren uste sendoa da transferentzia arrunten funtsak ez duela Baztango konplexutasuna kontuan hartzen, eta, ondorioz, bailarak dituen beharren araberako diru-ekarpena egiten.
Baztan da Nafarroako udalerririk handiena lur-hedaduraz (375 km2 ditu). Gainera, lurralde antolaketa konplexua du, hamabortz herri nagusiez gain, hogeita bi auzo eta ehunka baserri han-hemenka eremu aski zabalean. Horrek guztiak, oinarrizko zerbitzu publikoak eman ahal izateko giza-baliabide eta baliabide-material handiak eskatzen ditu, eta horretarako finantziazio aski.
DATUAK: Bide eta pistetan, Baztango Udalak bere ardurapeko 1.200 kilometro ditu, 75 baserrik oraino ez dute behar den bezalako biderik, 15 eskola eraikin ditu, 27 ur-biltegi, 5 mediku kontsultategi, hamazazpi frontoi, kiroldegia…
Egoera eta datuak diren bezalakoak izanik, Baztango udal agintariek azpimarratu nahi dute «XXI. mendea aitzinerat egiten ari den honetan, Baztanen oraino XX. mendeko gabeziak daudela eta neketan ari dela aldi berrirat egokitzeko ahaleginean; herritar aunitzen guttienekoak oraino ezin aserik baitabil, horregatik».