Ikamak, Ikasleen Nazioarteko Egunaren harirat, ikasleen eskubideak aldarrikatzeko elkarretaratzea eginen du gaur. Lekarozko institutuan bilduko dira, bigarren atsedenaldian, 13:00etan, estankean.
Euskal Herriko lurralde bakoitzean gazteek «neurri autoritario» ezberdinak jasan behar izaten dituztela argudiatu dute «Nafarroan ezinezkoa zaigu gure jardun politikoa aitzinera eramatea biltzeko eskubidea ukatu izan baitzaigu, Ipar Euskal Herriko etxeratze agindu orokorrarekin ikasleon erdia klasetik etxera eta etxetik klasera joan gaitezke bakarrik eta EAEn, espazio publiko zein pribatuan gehienez sei pertsona bildu gaitezke».
Egoera hau kontuan izanik, ikasturte hasieran egindako aldarrikapen berak eskatzen jarraitzen dute:
- Ikasleen ratioak jaistea eta espazioa berrantolatzea.
- Baliabide guztiak ikasleen eskura jarri eta hauen doakotasuna bermatzea.
- Hezkuntza eremuan pairatzen duten kontrol soziala, Covid-19aren testuinguruan areagotu dena, desagerraraztea.
- Hezkuntza eremuan hartzen diren erabakiak ikasleekin partekatzea.
- Euskaraz bizi eta ikasteko beharrezko diren bitartekoak eskaintzea.