Patricia Tornerok eta Isidro Tapizek gasna egiten dute Erratzun, baina ez edozein gasna. Merkatuan erraz aurkitzen ez diren produktuak eskaintzearen aldeko apustua egin dute: gazta urdina, pasta prentsatukoa eta pasta bigunekoa. Horretarako, familia-ustiategi ttikietako esne ekologikoa erabiltzen dute, behi zainduak, animalien ongizatea kontuan hartzen dutenak. Hileko lehen larunbatero, Iruñeko EKOmerkatuan aurki daitezke Pittika gasnak, bertzeak bertze, Navarra Bio egunkariari adierazi diotenez.
Konta iezaguzu zuen ibilbide ekologikoa. Nola hasi zineten, zer ekoizten duzue, non, nola?
2013an hasi ginen Pirinioetako ahuntz-talde batekin, desagertzeko arriskuan dagoen arraza batekin, eta gasnategi txiki bat eraiki genuen gure gaztak egin ahal izateko. Ahuntz-taldearekin bortz urte igaro ondoren, 2019an, gure gogoz kontra eta hainbat arrazoirengatik (bertzeak bertze, osasunagatik), inguruabarretara egokitzea eta gaztandegia bakarrik martxan uztea erabaki genuen, eta inguruko baserri bati erositako behi-esne ekologikoarekin gasnak egitea. Pena izan zen ahuntz-gasna egiten ezin jarraitzea, merkatu bat egina baikenuen, eta gourmetquesos-en gazta onena bezala ere finalista geratu ginen! Baina, beti aitzinera begira, abentura berri batean hasi ginen, oraingoan hainbat behi-gasna mota eginez (urdina, pasta prentsatukoa, pasta bigunekoa), beti merkatuan erraz aurkituko ez ziren produktuak eskaintzen saiatuz eta gure filosofia bera duten ekoizleekin lan eginez: familia-baserri txikiekin, non animalien kalitatea eta ongizatea lehenesten diren, eta ez soilik ekonomia. Ia bi urteren ondotik, nahiko pozik gaude, pandemiarekin tokatu zaigun hondamendi urtea gorabehera, produktua ongi ateratzen ari da eta lasaiago gaude.
Zergatik joaten zarette EKOmerkatura?
Ekomerkatua ezinbertzeko apustua iruditzen zaigu Iruñean zuzenean saltzeko. Hor gauden gehienok ekoizle eta egile txikiak gara, gure herrietan zuzeneko salmenta lehenesten genuenak, eta aukera ona da horrelako leku bat izatea hiriburuan. Hasteko ere urte txarra izan da, Coviden murrizketa guztiengatik, baina hala ere, oro har, jendea pozik dago. Gainera, ekoiztetxeak elkartzeko aukera bat da, denbora gutxi baitugu soziabilizatzeko!
Zergatik animatuko zenuke produktu ekologikoak kontsumitzera?
Izan ere, produktu toxikorik ez erabiltzean osasuntsuagoak eta seguruagoak izateaz eta zenbait neurri errespetatuko direla bermatzeaz gain (adibidez, antibiotikoak eta hormonak sistematikoki ez erabiltzea abeltzaintzan, bai industrian, bai tradizionalaren zati handi batean, GEOrik gabeko elikadura eta beste hainbat puntu), pentsatu behar da gure kontsumitzeko moduak eragin handia duela gizartean, ingurumenean edo ekonomian. Produktu ekologikoak eta hurbilekoak kontsumituz, tokian tokiko ekoizleei laguntzen diegu; horiek, aldi berean, landa-ingurunea bizirik mantentzen dute, ingurumena zaintzen dute, eta beste gazte batzuk beren herrietan kokatu eta bizitzeko aukerak sortzen ditugu.
