Iazko lehen esperientziaren ondotik, Euskal Herriko Unibertsitateak urtero eskaintzen dituen udako ikastaroen baitan, Baztango Udalarekin elkarlanean antolatutako Landa-eremuan zahartzea. Adineko pertsonak zaintzen laguntzeko sareak izeneko ikastaroa burutu zen atzo Elizondoko Arizkuenea kultur etxean. Egoerak eskatutako segurtasun neurri guztiak betez parte hartu zuten 25 lagunek, goiz eta arratsaldez landa eremua oinarri hartuta, adineko pertsonen zainketaren inguruan erreferentea den Matia Fundazioko kideek beren esperientzia desberdinak partekatu zituzten. Solasaldi eta mahai-inguruek osatu zuten egitaraua.
Adinekoekin lan egiten duten profesionalak izan ziren, batez ere atzoko jardunaldian parte hartu zutenak, eta arras gustura gelditu ziren atzoko saioarekin.