Bilera honetan ere, BKZ-k aitzineko aurkezpenetan erakutsi ez zituen proposamen berriak agertu zituen, hala nola aparkaleku berri bat, aparkalekua betez gero autobus 'lanzaderak' erabiltzeko asmoa edo ikasleak formatzeko ikastaroak.
Guzti hau ikusita Berro eta Beartzungo bizilagunei ez zaie iruditzen seriotasunez hartu denik gai hau, «proiektu argi eta zehatz baten beharra ikusten dugu, kotxe kopuruaren handitzea nola kudeatu behar den, segurtasuna bermatzeko zein moldaketa proposatzen diren Paularenako bidegurutzetik hasita Beartzungo auzoraino. Nork bermatu behar du guzti hau? BKZ-k?, udalak?, Nafarroako Gobernuak?»
Bizilagunen ustez «hau guztia kea da, airean dago, ez dugu aurreko fasean gertatu zitzaiguna berriz gertatzea: ahoz agindutako baldintzak, paperean ez sinatzeagatik bete gabe gelditu baitira». Horren adibidetzat jartzen dituzte «autobusekin gurutzatzeko zabalguneak, ez dela seinale bat bera ere paratu ez pintatu, ezta bezero taldeak errepide inguruan daudela adierazteko ere, susto bat baino gehiago eraginez eta arras gutitan joan dira furgonetak autobusaren aurretik autobusa datorrela abisatuz».
Barrideei aunitz arduratzen die gauzak egiteko dauden prisak, «ezin da etxe bat teilatutik hasi, edozertan hasi baino lehen bidea nola geldituko den azaldu beharra zaigu behar den bezala idatziz eta ardura hartuko duten erakundeen babesarekin».
Guzti hau erranik, Berro eta Beartzungo barrideek zera eskatzen diete Baztango herri guzietako batzarrei: «Urriaren 1ekoBatzar Nagusiaren aurretik herrietan egingo diren batzarretan gai hau ez bozkatzea, ez baiezkorik ezta ezekorik ere. Ez gaude proiektuaren kontra, hau ongi aztertu ahal izateko gauzak ongi aurkeztea eskatzen dugu, berme guztiekin».