Aurreko batzarreko aktaren irakurketa eta onespena eginen dute lehendabizi, hala erabakitzen bada. Bigarrenik, 2020 urteko etxesariko diru bilketaren gastu plana aurkeztuko dute. Hirugarren puntu bezala Erlategi eta Abartan karriketan trafiko erregulazioaren onarpena proposatuko dute. Ondotik hilerriko idazkaritza lana agentzia baten esku uztea eta hilerko Komisioarekin elkarlanean aritzea eztabaidatuko dute.
Bosgarren puntu gisa BKZ enpresaren Baztan Abentura Park 'mega Baztan Park' bilakatzeko proposamenaren gainean arituko dira. Berro eta Beartzungo zenbait barridek batzarreari eskatzen diote BKZ-k egindako eskaera ez bozkatzea, euren ustez «informazioa falta» delako. «Errepidearen inguruko bermeak eta proiektu konkretu bat» falta direla diote. Eskaera hau ez bada onartzen, BKZ-k egindako eskaera bozkatuko da. 'Baztan Abentura Park' handitzeko herri lurren okupazioa handitzea alegia. Modu horretan proiektuan aurreikusten diren ekintza guztiak onartuko dira eta behin betiko proiektu teknikoa idazten hasiko lirateke.
Batzarrea bukatzeko galde-eskeen tartea izanen da.