«Baztango nekazariek argi utzi nahi dugu, orain dela hamahiru urte bezalaxe, orain ere Magnak Erdizen proposatzen duen proiektua Baztango nekazaritzarekin bateraezina dela» azpimarratu zuten atzo egin zuten agerraldian. «Badakigu Magna multinazionala saiatu dela gutako batzuekin harremanetan paratzen, enpresa hauek ohitura duten bezala, gure hitza beren erasoak justifikatzeko erabili nahian. Gure mezua argia da: ez dezatela denbora gehiago galdu Erdizeko bazkalekuari gezurretan oinarritutako alternatiba artifizial bat proposatzen. Erdizeko bazkalekua ordezkaezina zen orain dela hamahiru urte, ordezkaezina da gaur egun, eta ordezkaezina izanen da etorkizunean ere» arrazoitu dute.
«Behin eta berriz aldarrikatu dugu lehenbiziko sektorea bizirik mantentzearen garrantzia. Azkeneko hamarkadetan gure ogibidea, bizimodua eta kulturaren oinarria den nekazaritzak alimaleko erasoak jasan ditu. Erdiz Baztango nekazaritzarendako alternatibarik ez duen sustengoa da. Erdizeko bazkalekuarekin sektorea bizirik mantentzea zaila baldin bada, Erdiz gabe ezinezkoa da. Magnaren proiektuak hilzorira eramanen lituzke gaur egun Baztanen gelditzen diren nekazaritza esplotazioak, gehienbat nekazari belaunaldi gazteek berriki martxan paratu dituztenak» ohartarazi dute.
Horiek horrela, «proiektu hau gure bizimoduaren eta etorkizunaren kontrako eraso gisa» ulertzen dutela azpimarratu dute. Horregatik, dei egiten diete herritar guztiei eurekin batera proiektu hau gelditzeko borrokatzera eta hemendik aitzinera antolatuko diren mobilizazio guztietan parte hartzera.
