Zaharberritu ondotik, gaur itzuli dizkio Kultura kontseilariak Baztango alkateari Iruritako Jauregizarreko giltzak

Nafarroako Gobernuaren Ondare Historikoaren Zerbitzua arduratu da azkeneko bortz urteotan Iruritako Jauregizarrea zaharberritzeaz. Guztira 982.356 euroko inbertsioa egin dute dorretxean eta gaur eguerdian Rebeca Esnaolak, Nafarroako Gobernuko Kultura kontseilariak, Iruritako Jauregizarreko giltzak itzuli dizkio sinbolikoki Joseba Otondori, Baztango alkateari. Giltzen itzulketa ekitaldia Jauregizarrean bertan egin dute eta zaharberritze proiektua gidatu duten Leopoldo Gil arkitektoaren eskutik, bisita gidatua eta egin dituzten lanen inguruko azalpenak entzun dituzte agintariek.

Inaugurazio ekitaldian Rebeca Esnaola Kultura kontseilariak, Joseba Otondo Baztango alkateak, Oihane Prim Iruritako alkateak, Ondare Historikoaren Zerbitzuko langileak, zinegotziak eta obraren arduradunak parte hartu dute.

Iruritako Jauregizarrea

Iruritako Jaregizarrea Baztango Udalarena da eta 1949an 'Monumentu Nazional' izendatu zuten. Ez hain aspaldi arte baserri izana da: beheitian aziendak, lehen eta bigarren solairuan etxebizitza, eta hirugarren solairuan belartegi edo ganbara gisa erabiltzen zuten. Kanpotik harrizko eskailera estali bat ere badu, solairu nagusira sarbide funtzioa egiten duena.

Aspalditik kasu handirik egin gabe, dorretxea noiznahi erortzeko arriskuan zegoen. Hori dela eta, Nafarroako Gobernuaren Kultura Zuzendaritza Nagusiak dorrea egonkortzeko egitura bat jarri zuen, eraikina erortzetik salbatzeko, eta, handik gutira, zaharberritze-lanak hasi zituzten.

2016an zurezko egitura zaharra desmuntatu eta paretak egonkortu zituzten. 2017-2019 urteen artean egin zituzten zaharberritze lanik handienak. 2017an egurrezko egitura berreraiki zuten, teilatua, egur lanak eta eskailera barne, eta kanpoko paretak ere zaharberritu zituzten. Lan horien gastua 593.557,49 eurokoa izan zen.
 

Azken fasean, 2018tik 2019ra, dorretxea barnetik moldatu zuten: barneko solairuetako zur-lan guztiak eta baita Dorrearen ingurua txukundu ere. Fase honek 319.418 euroko gastua ekarri zuen.

Orain bisitariak dorrera sartzeko bidea egokitzea falta da. Barruan dorretxearen historiari eta arkitekturari buruzko erakusketa-elementuak sartu nahi dituzte, baita Baztango eta inguruko bertze dorretxe batzuenak ere. Lan hauek Baztango Udalak eginen ditu.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun