Bizikletaren erabileraren aldeko aldarria Baztanen

Ttipi-Ttapa 2020ko abu. 20a, 10:30
Bertze hilabete batez, Izterpeko Matxinada mugimenduaren baitan, mugikortasun eredua aldatu eta bizikletaren erabilera bultzatzeko bizikleta ibilaldia egin zuten atzo arratsaldean Elizondoko eta Elbeteko karriketan barna. Hurrengo hitzordua irailaren 25ean eginen dute.

Joan den ekainean egin zuten lehenbizikoz bizikleta ibilaldia eta geroztik, egunerokoan bizikletan mugitzearen aldeko kontzientzia sortzeko hainbat herritarrek parte hartu dute ibilaldi hauetan. «Horretarako espresuki egindako soinu-orgaren laguntzarekin, lagun-giro ederrean egiten da,  ordu bateko itzuli ezti-eztian», adierazi dute.

Hurrengo hitzordua irailaren 25ean izanen da, «klimaren aldeko ekintza-egun globalarekin bat eginez». Horren harira, «irailekoak aldarrikapena gehigarria» izanen duela nabarmendu dute: «klimaren beroketaz eta aldaketaz herritarrak ohartaraztea eta, hori ahalik eta ttipiena izan dadin erroko aldaketa ekonomiko, politiko eta kulturak eskatzea».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun