Baztango Balleko Etxeko gobernu batzordeak Oronozko mediku-koltsulta zaharberritzeko eta zabaltzeko lanak eman ditu. Lehiaketara aurkeztutako zazpi enpresen artean Construcciones Boreste SL izan da eskaintzarik onena aurkeztu duena. 239.822,66 euro (gehi BEZa) gostako da abuztu erdialdera hasiko diren lanak egitea.
Azken urteetan zaharkitua gelditua da Oronozko mediku-kontsulta eta erabiltzaileei zerbitzu duina eman asmoz, zaharberritzea eta zabaltzea proposatu zuen Baztango Udalak. Otsailean ahobatez onartu zuen proiektua eta gaur egungo eraikuntzaren ondoan dauden 591,94 metro kuadro erabiltzea ere onartu zuen. Aparkalekua ere eginen da eraikinaren ondoan eta horrela, erabiltzaileek ez dute errepidea gurutzatu beharrik izanen.
Lan honetarako egin beharreko inbertsioa osorik Nafarroako Gobernuak ordainduko du, Osasunbideak emandako dirulaguntzaren bitartez. Baztango Udalak 9.000 euro ordaindu beharko ditu, lana egiteko behar den lur-eremua desjabetzerako.