Baztan ikergai duten ikasturte akabailako lanak diruz lagunduko ditu aurten ere Udalak

Baztan ikergai duten lau proiektuk jaso dezakete 500na euroko laguntza

Baztango udalak Baztan ikergai duten ikasketa akaberako proiektu edo lanak egiteko diru-laguntza deialdi berria egin du, proposamenak martxoaren 13rako aurkeztu beharko dituzte Balleko Etxean. Deialdian master akaberako lanak ere onartzen dituzte eta aurkeztutakoen artean 500 euroko lau laguntza banatuko dituzte.

2016an egin zuen lehenengoz deialdia Baztango Udalak, Baztango ikasleen artean Baztani eta Baztango etorkizunari buruzko kezka eta interesa piztu eta, beraiek egin beharreko lanak edo proiektuak helburu horretarako egiteko. Proiektuak eta lanak bakoitzaren ikasketa arlokoak izanen dira. 

Deialdian parte hartzeko ikasleek, eskariarekin, proiektuaren edo lanaren memoria aurkeztu beharko dute, gehienez lau orrikoa. Bertan helburuak, metodologia, iturriak, oinarrizko bibliografia… zehaztu daitezke. Memoria honek ikasketa akaberako proiektu eta lanaren tutorearen ongi ikusia beharko du. 

Aurkeztutako memoriak eta proposamenak helburu horrekin osaturiko batzordeak baloratuko ditu. Bertan Elizondoko lanbide eskolako zuzendaria, Lekarozko ikastetxeko zuzendaria, Cederna-Garalurreko teknikaria, Baztango alkatea eta udal idazkaria egonen dira. Batzordeak arloko adituekin kontsultak egiten ahalko ditu.

Eskariak aurkezteko epea Nafarroako aldizkari ofizialean argitaratu eta hilabete batekoa izanen da, beraz, martxoaren 13a artiokoa. Udaletxeko webgunean ere oinarriak eskuratzen ahalko dira eta edozein zalantzetarako udaletxerat joaten ahal da.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun