Eusko txanponak tokiko ekonomia nola laguntzen duen ezagutu dute Baztanen

Euskoa ezagutzeko Xebax Cristhyk Arizkunenean eskaini zuen solasaldiak jakinmina piztu zuen.

Xebax Cristhy, euskal moneta elkarteko lehendakaria izan da hizlari otsailaren 5ean Arizkunenean

Arras Baztan fundazioak antolaturik Ipar Euskal Herriko Eusko izeneko tokiko txanpona aurkeztu zuen Xebax Cristhyk, euskal moneta elkarteko lehendakariak,  Elizondoko Arizkunenea Kultur Etxean otsailaren 5ean egin den mintzaldian.

Ipar Euskal Herriko Eusko izeneko tokiko txanponak trantsizio ekologikoaren eta euskararen aldeko herritarren bulkaldia izan zituen hasieran. Bulkaldi horrek tokiko ekonomia aipatu balioen inguruan indartzeko ekimena abiatu zuen, lurraldeko norbanakoak eta profesionalak txanpon horren erabileraren bidez, norabide horretan ibilarazteko.

Christyk aipatu zuenez ekonomia lurraldearekin lotzen delarik, ekonomia birtokiratzen da, trantsizio ekologikoan lagunduz. Eusko txanponak hain zuzen, hori bilatzen du. Ildo horretan Euskoak laborantza industrialeko proiektuak ez ditu onartzen, ez saltoki handiak edo ingurugiroari kalte egiten dioten enpresak. Euskoak hortaz laborantza herrikoia, saltoki ttikiak eta ingurugiroaren aldeko enpresak laguntzen ditu eta horietarako bakarrik balio du. Enpresak edo negozio batek Euskoarekin bat egiten duelarik hurbileko hiru hornitzailerekin guttienez lana egiteko konpromisoa hartzen du, horrela ekonomia birtokiratzen lagunduz.

Halaber, euskara bultzatzea helburuen artean dagoenez, Euskoa erabiltzen duten enpresek seinaletika guztia elebiz izateko konpromisoa hartzen dute.

2013an Euskoa abiatu zenetik, txanponak alimaleko bilakaera izan du. Gaur egun 3.800 partikularrek erabiltzen dute, 800 enpresek eta hamarnaka herriko etxek, tartean Baionak. Denera 1,5 milioi Eusko dago zirkulazioan, ekonomia aipatu norabidean egunero mugituz.

 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun