Mozioak zioenez, «ehiza Nafarroan sustrai sozial, kultural eta ekonomiko sendoak dituen jarduera da eta Nafarroako botere publikoek lagundu, babestu eta sustatzea merezi du, bioaniztasunaren kontserbazioari eta Nafarroako landa munduaren garapen sozioekonomikoari egiten dion mesedeagatik». Bertzetik, Udalbatzak Ehiza laguntzeko konpromisoa hartu zuen, eta Nafarroako Gobernua eta Estatuko Gobernua jarduera hauek laguntzera premiatzen ditu, «landa munduaren garapen sozioekonomikorako motor eta ingurumenaren kontserbaziorako tresna diren heinean».
Botoaren azalpenean ehiztariek beraiek eta hein handi batean haien finantziazioarekin burutu duten lana azaldu zuen Geroa Baik: «Ikerketak eta kolaborazioak, hala nola liztor asiarraren kontrola, erbi europarraren eta mendiko untxiaren berreskurapena, oilagorren eraztuntzea, hegaztiei eraztunak jartzeko haurrentzako jardunaldiak, ibaien zaintzarako protokoloak, pisten konponketa eta egokitzeak, sastraka kentzeak, landatzeak, nekazaritza eta abeltzaintzan kalteen kontrola eta abar». Baztango Ezkerrak ehizaren kudeaketa defendatu zuen ere bailaran basurdeek sortzen ari dituzten kalte handien aurrean kontrolerako metodo moduan. Azkenean Geroa Bai, Baztango Ezkerra eta Navarra Suma taldeen aldeko botoekin onartu zen mozioa. EH Bilduk abstentziora jo zuen.