URRIAK 11, ORTZIRALEA
12:00etako txupinazoaren ondotik, 14:00etan haurren bazkaria izanen dute. Bazkalondoan, 16:30 aldera, haurrendako jokoak izanen dituzte. Bien bitartean, 16:00etan mus txapelketa jokatuko dute. 21:30ean, tradizioari eutsiz, zopak jateko bilduko dira. Palikin DJaren musika lagun, gaupasa eginen dute eta goizaldean, 06:00etan, xingar jatean bilduko dira.
URRIAK 12, LARUNBATA
Begi bat itxi orduko bertzea irekitzeko tenorea ailegatuko zaie. Izan ere, 10:00etan argi-soinuak izanen dira herrian. Eguerdian Ariztegiko ermitan meza entzunda, luntxean bilduko dira. 19:00etan Erramun Martikorenaren ahotsa izanen da protagonista eta haren oihartzuna gogoan dutela, 22:00etan herri-afaria eginen dute. 00:00etatik aitzinera, Jotatxo DJak girotuko du herria eta goizaldean, 06:00etan, galtzontzillo eta kulero lehiaketa eginen dute.
URRIAK 13, IGANDEA
10:00etako argi-soinuen ondotik, herritarren arteko desafioa jokatuko dute. 14:00etan zikiro jatean bilduko dira eta ondotik Agerraldek girotuko du herria. Afalondoan bestan segitzeko aukera izanen dute.
URRIAK 14, ASTELEHENA
10:00etan argi-soinuak eta 14:00etan gazte-bazkaria izanen dute. 16:30ean jokoetan bilduko dira. Afariarekin eta gaixoa ni abestuz akituko dituzte bestak.