Joan den igandean, lehiaketa honetako bigarren proba puntuagarria jokatu zen. Iturengo Asier eta Ander Telletxea anaiek eta Arizkungo Julen Valerrek debuta egin zuten eta beraiekin batera, lehendik ere esperientzia bazuen Iratxe Ibañez iruritarra ere ibili zen. Alebinetan, hamahirugarren postuan sailkatu zen Ander Telletxea. Oihan Aleman eta Oier Ibañez iruritarrak 19. eta 21. postuetan sailkatu ziren.
Infantiletan, Ivan Villoria iruritarra seigarren izan zen sprintean eta Eneit Bertiz sunbildarra bederatzigarren. Ivan Villoria hirugarren da Openeko sailkapen orokorrean.
Denboraldi berrirako lanean ari den Baztandarra Txirrindulari Elkartea eta zenbait babesleren laguntza lortu ondotik, taldeki ekipazio berriak egiten ari dira. Elizondoko Malmöenea estudioko Juan Angel Perotxenak egin du diseinua, musutruk.