Larrialdi zerbitzuan atzo goizean, 09:25ean, jaso zuten deia. Etxeluzea etxeko teilatua da erre dena, Berroetako Karrika Nagusian dagoen etxe bat. Momentu horretan ekaitz erasoa zegoela eta leherketa handi baten asotsa aditu zela jakinda, tximista batek eragindakoa izan zitekeela adierazi zuten. Suhiltzaileak ezbeharra gertatu ziren tokira joan ziren eta 13:20 ingurura arte itzaltze-lanean aritu ziren.
Zauriturik ez
Sutea gertatu zen momentuan hamabi urteko gaztetxo bat eta bere amatxi etxebizitza barrenean zeuden, lehendabiziko eta bigarren solairuan, hurrenez hurren. Suteak teilatuan eta ganbaran eragin zuenez, ez ziren zaurituak izan. Aitzitik, suak teilatu osoan eragin zuen eta goitiko solairuko gelan kalte handiak eragin ditu. Bertzeak bertze, ganbaran zituzten altzariak erre ziren. Gainera, sua itzaltzeko erabilitako ura beheitiko solairura pasatu zen.