Asteazkenean barrakonera joaterik ez dutenek txartelak erosteko bertze aukera bat izanen dute ortzegunean. Goizeko hamarretatik aitzin, txartelak@baztandarrenbiltzarra.eus helbidera idatzita eskuratu ahal izanen dira. Emailen ordena errespetatuko da eskariak egiterako orduan. Ezarritako ordua baino lehen iristen diren eskariak ez dira kontuan hartuko.
Bertzalde, Karmele Gomezek Baztandarren Biltzarra iragartzeko egindako kartelean oinarritutako kamisetak erosi ahal izanen dira, aste osoan, iluntzeko zortzietatik aitzinerat, elkartearen egoitzan. Irrintzi baztandar bat irudi bihurtu du Gomezek, sinestesia deituriko zentzumenaren bitartez.
Badira aste batzuk Baztandarren Biltzarraren tonbola martxan dagoela, baina oraindik gelditzen dira boletoak. Nahi izanez gero, Baztango zenbait komertziotan erosi daitezke. Zentzu horretan, Baztandarren Biltzarra elkarteak jakinarazi du urtetik urtera salmenta puntuak aldatu egiten direla, ez dagoelako komertzio guztietan saldu ahal izateko adina boleto. Aurten tonbolako boletoak saltzeko aukerarik izan ez duten zenbait komertzioren kexak jaso ditu elkarteak, eta horregatik barkamena eskatu nahi die izan diren gaizki-ulertu eta trabengatik. Aurrerantzean, halako arazoak izan ez daitezen, bi aldeen arteko komunikazioa hobetzeko ahalegin berezia eginen du Baztandarren Biltzarra elkarteak.
Balkoiak eta erakusleihoak apaintzeko deia
Baztango hamabortz herrien besta handia dela eta, aurten berritasun modura, elkarteak herritarrei eta komertzioetako kideei balkoiak eta erakusleihoak apaintzeko gonbita egiten die. Sabaietan gordetako zapi, objektu zahar eta lanabesak baliatu eta Baztan osoko herriak girotzea da asmoa.