Hirugarren mailako aizkora txapelketaren kanporaketa
Nafarroako hirugarren mailako aizkora txapelketako kanporaketan, berriz, abuztuaren 17an Burlatan jokatuko den finalerako bortz txartel erabaki ziren. Bi kanaerdiko moztu behar zituzten aizkolariek eta Arribeko bi aizkolariak nagusitu ziren: Txomin Amundarainek 5 minutu eta 3 segundo behar izan zituen lana burutzeko eta Ibai Soroak 5 minutu eta 22 segundo; hirugarren, Leitzako Julen Olano izan zen (5.27), laugarren Navacerradako Victor Suarez (6.09) eta bosgarren Anotzeko Eneko Pagola (7.56). Finaletik kanpo gelditu ziren Berako Oier Larretxea (9.29) eta Iruritako Marc Duch.
Proba konbinatu erakustaldia ere egin zuten kimu mailan eta Igantziko kirolari gaztetxoak bertan izan ziren.
Nafarroako txinga-eramate txapelketak gaur
Uztailaren 11n, ortzegun eguerdian, gizasemeen eta emakumezkoen txinga-eramate txapelketak erabakiko dira Iruñean eguerdian. Gizonezkoetan, Arraiozko Dani Saldias izanen da eskualdeko ordezkaria eta berekin batera, Berriozarko Oskar Aguas eta Iker Goldarazena ariko dira. Emakumezkoetan, Lesakako Xanta Sousarekin batera Iruñeko Esti Gastearena ariko da.
Aizkora erakustaldia ere eskainiko dute Zigako Joxean Etxeberriak eta Lezaungo Juan Jose Lopezek eta harri-jasotze erakustaldia Aimar Irigoienek.