Aspertzeko tarterik gabe
Bereziki maite dute lehenbiziko eguna: «Baztan zopak gogoz eta bestondorik gabe hartzen ditugulako». Ondoko egunetan ere ez dute aspertzeko tarterik: «egunero bada zerbait, baztan zopetatik hasi eta zikiro egunera arte. Tartean haurren eguna, gazteena eta Sanjuan eguna izaten ditugu». Eta egunez egun, errepikatzen den argazkia ere bai, dantzariz betetako plazarena: «arizkundarrak franko dantzariak gara, plaza borobila dugula aprobetxatu beharra dago».
Sanjuanak aipatu eta ezin suak piztu gabe utzi: «jendetza biltzen da sanjuan bezperan. Aunitzendako bestetako ekitaldirik politena izaten da. Ezkil jotzeak eta suak bikote ederra osatzen dute».
Berrikuntzei ere tokia eginez
Tradizioak soilik ez, berrikuntzek ere erakartzen dute jendea eta horren erakusle da «azken urteetan Arizkun Rock jaialdiak hartu duen indarra. Ortziralean jende aunitz etortzen da kontzertuen aitzakipean».
Mimoz prestatu dutenak arrakasta izatea nahi lukete orain. Ezer guti gehiago egin dezakete: «herritarrak bestara animatzeko barra librea jartzea izanen litzateke sekretua baina ezin dugunez, barra librerik gabe, eginen diegu gonbidapena». Suaren bueltan bildu eta denen artean besta giroa hauspotzekoa.