Gaur egungo gure gizartean, zahar etxeek betetzen duten zerbitzuak gero eta garrantzi handiagoa duela uste du LABek: «Zerbitzu honek oinarrizko behar bat betetzen du eta honen gestioa esku pribatuetan egotea, hau da, batzuek honen bitartez etekin ekonomikoa bilatzea guztiz onartezina da. Onartezina ez bakarrik horren gibelean dagoen filosofiagatik, baizik eta etekin horiek eskuratzeko aunitzetan bai langileen baldintzak eta bertan ematen den zerbitzua ere kaskartuak izaten direlako».
LAB sindikatuari benetan kezkagarria iruditzen zaio «patronatuko markoak, non ordezkari publikoak baitira, hain modu garbian oinarrizko zerbitzua den hau esku pribatuetan segitzearen alde egin izanak; are gehiago langileak arras gustura daudela bezalako aitzakia guztiz faltsuak erabili direlarik erabaki hori hartzerako orduan».
Idatzi honekin zenbait helburu bete nahi izan ditu LABek: «alde batetik ematen den egoera zein den jakinaraztea, sortzen ahal diren arazoen inguruan abisua eman eta honen gibelean dagoen filosofia modu garbi batean salatu».
LABen arabera, «gai hau ez da zerbait puntuala eta ziur gaude etorkizunean ere zer erranak emanen dituela. Argi izan dezatela guzti horren aitzinean, ez LAB eta ezta zahar etxeko langileak ere ez garela geldirik egonen».