Irribarrea ezpainetan, «arras kontent, gogotsu» hasten dituzte herriko bestak, «lehenengoak izaten dira eta hori nabari da bai herrikoen eta baita kanpotik etortzen direnen artean ere».
Adiskide onekin orduak labur izaten omen dira eta besta giroan zer erranik ez: «egunean zehar izaten diren ekitaldi guzietan parte hartzen dugu edo lagunekin zerbait hartzera joaten gara». Eta gaua iristean ere, ezin erretiratu: «besta pixka bat egiten dugu egunero».
Musika adituta ezin dute geldirik egon: «nahiago dugu ostatuan egon baino dantzan aritu» eta hala ibiltzen dira, «erromeri edo udako abestien erritmoan».
Egitarau betea
Denok gustura egoteko moduko egitaraua izaten dela uste dute, «egunero izaten da ekitaldi bereziren bat». Bat aukeratzeko eskatuta, «asteazkenean egiten diren zopak» aipatu dituzte: «arras giro polita izaten da, herritarrek soilik egiten baitugu besta». Ortzegunean indarrak berreskuratu ondotik gogotsu heltzen diote ortziralari: «gazte bazkaria egiten dugu. Gainera, herritarrez gain kanpoko jendea ere etortzen da». Denei luzatu diete bestarako gonbidapena: «herriko bestak aukera ona dira jendearekin elkartu, solastu eta egoteko». Beraz, bi gazte hauen erritmoan edo lasaixeago, baina animatu bestara!