Apirilaren 27an, larunbatean 12:45ean Berrizko Olakueta plazan sei aizkolari ariko dira, hurrengo kanporaketarako bi txartelen bila. Zigako Joxean Etxeberriarekin batera, Juanjo Lopez Azpilikueta eta Eneko Saralegi nafarrak eta Julen Alberdi Txikia IV.a, Xabier Zaldua eta Jexux Mari Mujika gipuzkoarrak ariko dira. Txapelketa honen finala ekainaren 7an jokatuko da Azpeitian.
Aizkolariekin batera, Urrezko Binakako harrijasotze txapelketan Aimar Galarraga eta Iñigo Eizagirre ariko dira eta jaialdia bukatzeko, Emakumeen trontza txapelketako lehen jardunaldia jokatuko dute Karmele Gisasola Zelai III.a eta Uxue Ansorregik, Ainize Perez eta Iraide Gezuragaren kontra.
Gazte mailako finalaurrekoa Gasteizen igandean
Apirilaren 28an, igandean 12:30ean Gasteizko Armentia zelaian, San Prudentzio eguneko ospakizunen baitan, Urrezko banakako aizkolari txapelketako 23 urtez beheitiko gazte mailako finalaurrekoa jokatuko dute. Hemen ere, Joxean Etxeberria zigatarra ariko da, Ioritz Gisasola Zelai IV.a, Julen Larrea III.a eta Oier Kañamares IV.arekin batera. Finalerako bi txartel izanen dituzte jokoan.