Txapelketa berezia izan da aurtengoa, ez baita bikote finkorik izan. Aurrelari guztiak atzelari guztiekin aritu dira bikote eginez, eta lortutako emaitzen arabera jokatu dituzte finalerako txartelak. Pablo Fustok jardunaldi baten faltan lortua zuen finalerako txartela, baina Ibargaraik azken unean eta errebotez lortu zuen txartela. Izan ere, azken partida 3-1 galdu zuen erratzuarrak, baina Urrutiak 3-0 galdu zuen azken partida hori eta horrela lortu zuen finalera sartzea Ibargaraik.
Erratzuarrak aipatu duenez, «txapelketa ona jokatu dut, baina hobekin jokatu behar nuen egunean ez nuen hala egin. Gaueko txandan aritu nintzen aste osoan eta partidan nabaritu nuen». Orain, Fustorekin jokatzearekin, faborito izanen da: «Finalak irabazteko daude. Buruz burukoan kendu nuen arantzatxoa eta ea binakakoarekin urtea borobiltzerik badugun!», dio Erratzuko atzelariak.