Bertzeak bertze, hitzordu hauen bidez, solaslagunek bertako mintzamolde jatorrak aditzeko eta adinekoen jakintza jasotzeko aukera dute. Aldi berean, partaideen euskarazko harreman-sarea hedatzea, adinekoekiko harremana estutzea eta hizkuntza-portaeretan eragitea lortu nahi dira.
Solaslagunatik adierazi dutenez, aitzineko urteetan bezalaxe, «hitzordu hauek arrunt aberasgarriak izan dira partaide guzientzat, hainbat gaien inguruan solastatzeko parada izan baikenuen. Hala nola, adinekoak garai bateko baserriko lanez eta haurtzaroko kontuez mintzatu ziren gurekin, baina baita bertsolaritzaz edota egunerokotasuneko kontuez ere. Irri franko egin genuen Pernando Amezketarraren pasadizoak aditzen!».
Hori gutti balitz, aldo oro berendu goxo bateko harrera egiten zieten adineko egoitzan eta azken egunean, Baztanen egindako zenberena goxoa probatzeko aukera ere izan zuten. Horregatik, Solaslagunatik eskerrak eman nahi dizkiete parte hartu zuten guztiei, «bereziki Francisco Joaquin Iriarte egoitzako kide eta langileei, hain ongi hartu gintuzuelako. Laster arte!».