Etxez etxe kantuan eta dantzan
Joan den urtera arte horixe zen elizondoar gaztearendako inauterien hasiera. Dena dela, aukera ikusi bezala, ortzirale goizeko giroa dastatzea erabaki zuen: «lehenbizikoz, etxez etxeko bueltan ibili nintzen eta zoragarria izan zen». Gaztetxean bildu eta gosari ederra egin ondotik jantzi zuten mozorroa: «kantuan eta dantzan ibili ginen, etxeetan emandako mokadutxo eta tragoxkak lagun genituela».
Musikak girotu, objektuarekin antzeztu
Biharamunari ernatzeko astirik eman gabe, «goizean goizik» hasi ohi du larunbata baztandarrak: «indarrak hartu eta kuadrilla bakoitzak prestaturiko orgarekin karriketan barna ibiltzen gara». Dena dela, aitzinetik ere lan pixka bat egin behar izaten dute: «lagun-taldean elkartu eta mozorroa pentsatzen dugu». Ideiak burutik paperera eraman ondotik, «bozketa bidez, gai bakoitzari puntuazioa jarriz» aukeratzen dute urteko gaia. Aitortu digunez, ez da erraza izaten: «buruhauste handiak eragiten ditu eta denen gustukoa izatea zaila da».
Ongi pasatzeko gutti aski dela argi islatzen du Tarratak kuadrillak: «gaia erabakita dugularik, ez dugu lan handirik egiten». Bada, ordea, lagungarri zaien zerbait: «musika eraman ahal izateko zerbait egiten dugu». Elizondoar gaztearearendako bada antzezterakoan lagungarri den bertze gauza bat: «normalean objektu batean pentsatzen dut, esku artean zerbait izatea lagungarri zait. Itzuli eta buelta, mahai-inguruan egiten dute hurrengo geldialdia: «kuadrilla-bazkaria egiteko ohitura dugu eta gogotsu bagaude ostatuetan akitzen dugu». Bazkariko solasaldiak gustuko dituela ukaezina bada ere, herri-giroa eteten duela iruditzen zaionez, bere proposamena bota du: «taldekako bazkarien ordez herri-bazkaria egitea ongi legoke».
Egun guztietan mugimendua
Inauterietan «goizean hasi eta gorputzak iraun arte egoteko aukera» izaten du. Izan argi dagoelako edo izan gorputza hobe dagoelako, Urrutiak egunez diren bestak «nahiago» ditu. Ilun dagoenean ere ostatuetako argitasunean eroso sentitzen denez ez du erretiratzeko presarik izaten. Badaki berak horrenbertze gozatzeko herritar talde batek lan handia egiten duela eta ez ditu aipatu gabe utzi: «agerikoa da antolatzaileek egiten duten lana, haiei esker Elizondoko inauterietan adin guztiendako jendearendako dira».