Elektrizitatea autokontsumo partekatuaz aritu ziren Erratzun

Dagoeneko hasiak dira plaka fotovoltaikoak paratzeko herriko toki erangikor eta onenen bila Erratzun.

Ekonomian aditua den Alex Arizkun elektrizitate ekoizpen partekatuaren inguruan mintzatu zen otsailaren 1ean, gaiarekin interesa azaldu zuten hogei herritarren aitzinean. 

Otsailaren 1ean Erratzuko lixutegian  bildutako hogei herritarrek beraien elektrizitatea partekatutako instalazioen bidez sortzeko interesa erakutsi zuten. Horrela, hiru helburu erdietsi nahi dituzte: erregai fosilen erabilera gutitu eta atmosferarako kaltegarriak diren gasen isurketa murriztea, energia kontsumitzea konpainia handien menpe egon gabe eta erabilitako energiaren fakturaren kostua murriztea. Beraz, herritar horiek lantaldean eta auzolanean oinarrituz, lege berri batek zabal ditzakeen bideak aztertu nahi dituzte.

Proiektua aitzinera atera dadin, lanak eta ardurak banatu dira. Dagoeneko hasiak dira plaka fotovoltaikoak paratzeko herriko toki erangikor eta onenen bila eta partaideen artean informazioa trukatzeko metodo egokien bila. Halere, lehenbiziko fase hau irekia denez, oraino izena eman ez arren, informazioa izan nahi duen herritarrak aski du Joxe Itoizi, Erratzuko alkateari, izena eta posta elektronikoa ematea.

Lehendabiziko pausoa Baztango Udalarekin eta Nafarroako Gobernuarekin elkartzea izanen da. Era horretan, proiektua behar bezala azaldu, babesa eskatu eta egitasmoa aitzinera ateratzeko bete beharreko baldintzak zehaztu nahi dira.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun