Canteras Acha S.A. enpresak kudeatzen duen Arritxuriko harrobia zabaltzeko eskaria egin zuen duela urte batzuk eta Batzar Nagusiak, txostenak aztertu eta Almandozen egindako galdeketan proposamen honen aitzinean baiezkoa nagusituta, onartu egin zuen eskaera.
Tartean, dena den, harrobitik materiala ateratzeko bide berri baten beharra ere ikusi zen eta horrek ere, bere garaian, eztabaida piztu zuen. Herritarren artean ezadostasunak izan ziren eta prozesua uste baino gehiago luzatu da urteetan, ingurugiro txostenak tarteko.
Urtarrilaren 2ko Batzar Nagusian, Ingurumen Departamentuaren baiezko txostenaren berri eman zen. Juan Kruz Iriarte, mendi zinegotziak, Almandozen herritarren batzarre bat egitea proposatu zuen, Ingurumen Departamentuak onartutako balizko bidearen inguruko informazioa helarazteko, herritar guztiak jakitun izan eta, horren arabera, erabakiak hartzeko.
Era berean, Batzar Nagusiko kideak bilduko dituen bertze bilera informatibo bat egitea ere proposatu zen, hauek ere informazio osotua jaso dezaten eta honela, denek egoeraren jakitun, erabakia har dezaten. Luis Roldan, Almandozko alkateak deitoratu egin zuen urte anitz daramatela afera honekin eta Almandozko herritarrak nardatuak daudela adierazi zuen. Behingoan bide berria nondik joanen den jakin nahi dutela eta herritarrei lekua bertatik bertara erakustea nahi duela.
Batzar informatiboak egitea eta denak egoeraren jakitun izatean, bide berriaren inguruko erabakia hartzekotan gelditu ziren.