Izan ere, herrietako alkateak bi urtean behin berritzen dira eta Iruritan, Arizkunen eta Amaiurren izan ezik, bertze hamabi herrietan alkateak aukeratu dituzte. Hiru hauetan, Errege Egunean eginen dituzte batzarrak, herriko ordezkaria aukeratzeko bertze saiakera bat eginez.
Gainera, lau urtetik behin, Baztango lau kuarteletako ordezkariak eta mendi komisionatuak aukeratzen dira, eta hauek ere orain aukeratuko dituzte. Beraz, beraien karguak berrituko ez dituzten batzarkideek asteazkenekoa izan zuten azken Batzar Orokorra. Beraien lana eskertu zuen Joseba Otondo Baztango alkate eta Batzar Orokorreko lehendakariak.
Hautagai zerrenda
Alkate, batzarkide eta mendi komisionatu berriek apirilean eginen den hurrengo Batzar Orokorrean hartuko dituzte karguak ofizialki, baina bozketa herri bakoitzean egiten den lehen batzarrean eginen da.
Baztangoizako juntero izateko Miguel Etxandi Irigoien izanen da hautagaia eta mendi komisionatua izateko ez da inor aurkeztu.
Elizondoko junterio izateko hautagaia Mikel Sobrino Urrutia da eta mendi komisionatu izateko bi hautagai daude: Luis Javier Laurnagarai Mihura eta Iban Larratxea Irigoien.
Erbereako juntero izateko hautagaia Peio Obregozo Istilart da eta mendi komisionatua izateko ez da inor aurkeztu.
Basaburuako juntero izateko hautagaia Rafael Arretxea Maritorena da eta mendi komisionatua izateko, Pedro Maria Gamio Gaztelu.