«Etxeko langileei buruz ari garela etxeetan adineko jendeak edo menpekotasun egoeran dauden pertsonak zaintzen aritzen diren langileetaz ari gara, horietako aunitz interna moduan, eguneko 24 orduak esklusibotasunez eta arduraz osoz eginkizun horretan arituz. Langile horiek, etxeko lanak eta mantenimendua egiten dute eta horretaz gain, bertze hauek ere bai: sendagaiak eman, ospitalizazioetan zaindu, paseoetan lagundu…», adierazi dute aurkezpenean.
Etxeetako langileen lan-baldintzei buruz ari garela bi kontu bereziki aipatu behar dira: batetik sektorearen erregulazio falta eta, bertzetik, administratiboki egoera irregularrean dauden langileen egoera. Guzti horrek, maiz, soldata eta lan baldintza makurragoak izatea ekartzen du. Modu berean, maiz ere, interna gisa ari diren etxeetan pribatutasunik eta espazio pertsonalik ez dute, aisialdia eta denbora librea eskas izaten dute eta horrek, langilearen gainkarga fisiko eta mentala ekartzen du bizi prekaritatea handituz.
Horregatik etxeetan adineko pertsonak zaintzeko langileak kontratatzen dituzten herritarrengana hurbildu nahi du Baztango Udalak, «denen artean, langile hauei ere, interna edo externa aritu, lan-baldintza duin eta bidezkoak eskaintzeko».
Eta lan-baldintza duin eta bidezkoak izateko beharrezkoa da guttienezko lan-saria ematea eta behar adina asti libre segurtatzea; zaintzaileak ere zaintzea eta adinekoekin egiten duten lana baloratzea.
Hortaz, nahiz sektorea arautzea eta atzerritartasun legea aldatzea udalaren eta herritarren eskuetan ez egon, neurri batean bederen, aipatutako lan-baldintza justuak eskaintzea gure esku dagoela uste du Balleko Etxeak. Horregatik, herritarrak errealitate honi buruz ohartarazi nahi dituzte, bertze langileekin ere justuak eta etikoak izan daitezen.