Giro ederrean joan da Anizko Asteburu Kulturala

Ttipi-Ttapa 2018ko abe. 10a, 07:39

Parajeetako izenak zurean zizelkatu eta bakoiotza bere lekuan paratu zuten 

Abenduaren 8an, larunbatean, eguraldia lagun 30 aniztar herriaren inguruko parajetan barna ibili ziren Aitorren azalpenak adituz. Belagi eta paraje bakoitzaren izena, zein etxetakoa den, nork erabiltzen duen.... akabailan zurean zizelkaturik paraje bakoitzaren izena paratu zen, hemendik goiti Lutran, Estrakazar, Amurru, Istilegi... izenak haurrek ere erabil ditzaten.

 

Bi orduko itzulixkaren ondotik, arratsaldeko 3:30ean ginkana herrikoia izan zuten. haur, gazte eta heldu jokoetan aritu ziren: antzerkia egiten, etxeetan lehengo istorioak aditzen, hitzik egin gabe etxeetan gauzak eskatzen mimikaz, puzzlea egiten... joko andana prestatu zituzten Ainhoak, Kristinak eta Maiderrek aniztarrendako. Bi ordu pasaz jostetan aritu ondotik,  txokolate jatea izan zen elkartean. Txokolatea jan bidenabar, Anizen orain dela bi urte grabatutako auzolan programa ikusi zuten aniztar guztiek batera, baita bestetako zenbait argazki ere. 

Eguna akitzeko  bertso saioa izan zen Oihana Iguaran eta Aitor Sarriegirekin. 56 lagun bildu ziren, giro ezin hobean bertsoak aditzera. Goizeko ordu txikiak artio luzatu zen besta. 

Igandean, abenduaren 9an,  asteburu kulturalak jarraipena izan zuen, talo ikastaroan ere adin guztietako aniztarrak bildu ziren, Iñakiren gidaritzapean taloak egitera. Norberak eginikoa jan eta arratsaldean haurrendako bideo emanaldia izan zen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun