erran.eus

Saats Karasatorrek jantzi du VIII. Mariano Izeta Sariketako txapela

  Kultura  Baztan  Elizondo

Josu Sanjurjo lesakarra txapeldun orde suertatu zen azaroaren 23an Elizondon

Azaroaren 23an, joan den ortziralean jokatu zen VIII. Mariano Izeta sariketako finala, Elizondoko Arizkunenea kultur g, 80 bat entzuleren aitzinean. Etxarri Aranazko bertsolariak bildu zuen puntu gehien (246). Haren gibeletik sailkatu ziren Josu Sanjurjo lesakarra (242,5), Mikel Lasarte (242), Sarai Robles (231,5), Irati Majuelo (214,5) eta Oronoz-Mugairiko Amaia Elizagoien (211). Lasarterentzat izan zen bertso onenaren saria, koplen ariketan utzitako lehen bi aleengatik. 

Saats Karasatorrek jantzi du VIII. Mariano Izeta Sariketako txapela
Mariano Izeta sariketako finalistak eta gai-jartzailea, Mariano Izeta zenaren alargunarekin eta alabekin. | Ikusi handiago | Argazki originala

 

Joseba Beltza, Estitxu Arozena eta Julen Zelaieta aritu ziren epaile lanetan. Gai-jartzaile lanak, aldiz, Maialen Belarrak bete zituen.

Irurtzunen eta Lizarran jokatutako bi kanporaketen ondotik jokatu zen sariketako finala, aitzineko bi saio horietan sailkatutako sei bertsolariekin. Xabat Illarregik ere finalean behar zuen, baina ezin izan zuen parte hartu, eta Irati Majuelok hartu zuen bere tokia, bere sailkapen saioan hurrengoa izateagatik. Finalean, ondorengo lanak bete behar izan zituzten sei bertsolariek: zortziko handian hiruna bertso, zortziko txikian hiruna bertso, bina punturi erantzun, hiruna kopla, eta bakarka, gaia emanda, bina bertso. Behin lan guztiak amaitutakoan jakinarazi zuen epaimahaiak bere erabakia. Ines Izeta Mariano Izeta zenaren alabak jantzi zion txapela Karasatorreri, Elizondon bildutako 80 entzuleen txalo artean. Gabriela Goñi (Marianoren alarguna), alaba Juana Mari eta biloba Amaia ere bertan izan ziren,

Hala, Izeta sariketako txapeldunen zerrendara gehitu da Saats Karasatorreren izena, beste hauekin batera: Jon Barberena (2004), Oier Lakuntza (2006), Jon Elizetxe (2008), Iñaki Aleman (2010), Aimar Karrika (2012), Saioa Alkaiza (2014) eta Joanes Illarregi (2016).

 

Mariano Izeta gogoan

Nafarroako Bertsozale Elkartea eta Baztango Udala dira Mariano Izeta Sariketaren antolatzaileak, eta Baztango Bertso Eskola ere aritzen da finala antolatzeko lanean.

Mariano Izetak (Elizondo, 1915-2001) herri kultura eta bereziki bertsolaritzaren alde egindako lan handia eskertzeko helburua du bere izena daraman sariketak. Lanbidez erloju-konpontzailea zen Izeta, baina horretaz aparte lan itzela egin zuen herri kultura eta ondarea biltzen eta ezagutarazten. Egindako guztiagatik, Baztango seme kuttuna izendatu zuten. Idazle, “Nafar Izkuntza”-ko kolaboratzaile, Euskaltzaindiko kide, Baztango hiztegien egile, mutil-dantzen sustatzaile… hamaika kontutan ibili zen Izeta.

Bertsolaritza izan zen bere zaletasunik handienetakoa. 1936. urtean egin zen lehen Nafarroako Bertsolari Txapelketan lagundu eta hortik aurrera hamaika bertso saio antolatu zituen. Nafarroako Bertsozale Elkarteko ohorezko presidentea zen.

Izeta Sariketak, garai batean jokatzen zen Xalto Sariketa edo iaz abiatutako Bertsokabi Sariketa bezalaxe, Nafarroako bertsolari gazte eta hasiberriei bultzada ematea du xede, plazak eskainiz, haien bertsogintza garatu eta ezagutzera eman dezaten.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa