Hamabi bertsolari gaztek hartuko dute parte VIII. Izeta Sariketan

Hamabi bertsolari gaztek hartuko dute parte VIII. Izeta Sariketan
Mariano Izeta gogoan, zortzigarrenez jokatuko dute bertsolari gazteek sariketa.

Azaroaren 23an Elizondon jokatuko den finalaren aitzinetik bi kanporaketa jokatuko dituzte ortzirale honetan Irurtzunen eta Lizarran

16 eta 30 urte bitarteko Nafarroako hamabi bertsolarik hartuko dute parte azaroaren 16an abiatuko den Mariano Izeta Sariketan. Bi kanporaketa izanen dira ortziralean Irurtzunen eta Lizarran. Ordu berean jokatuko dira bi kanporaketak, eta gai berdinei erantzun beharko diete bertsolariek. Saio bakoitzetik hiru bertsolari sailkatuko dira, eta horiek izanen dira azaroaren 23an finala jokatuko dutenak, Elizondon. Hor erabakiko da sariketaren zortzigarren edizioko txapelduna.

 

Kanporaketa. Azaroak 16, ortziralean 20:00etan Irurtzungo Pikuxar Elkartean (doan)

Mikel Lasarte (Barañain), Amaia Elizagoien (Oronoz Mugairi), Saats Karasatorre (Etxarri Aranatz), Idoia Granizo (Altsasu), Patxi Castillo (Bera) eta Aitor Irastortza (Azpirotz) . Gai-jartzailea: Zigor Gartzia.

 

Kanporaketa. Azaroak 16, ortziralean 20:00etan Lizarrako La Bota Peñan (doan)

Sarai Robles (Barañain), Endika Legarra (Iruñea), Xabat Illarregi (Leitza), Irati Majuelo (Iruñea), Egoitz Gorosterrazu (Ituren) eta Josu Sanjurjo (Lesaka).Gai-jartzailea: Maialen Kamino.

 

Finala azaroaren 23an Elizondon

Aipatu bezala, finala hurrengo ortziralean, azaroaren 23an, 19:30ean jokatuko dute Elizondoko Arizkunenea Kultur Etxean, bi kanporaketetako hiru lehen sailkatuek. Gai-jartzaile lanean Maialen Belarra ariko da.

 

Zortzigarrenez, Mariano Izeta gogoan

Nafarroako Bertsozale Elkartea eta Baztango Udala dira Mariano Izeta Sariketaren antolatzaileak, eta Baztango Bertso Eskola ere aritzen da finala antolatzeko lanean. 2004. urtean antolatu zuten sariketa lehen aldiz, eta bi urtean behin jokatu da ordutik; tarte horretan, ondorengoak izan dira txapeldunak: Jon Barberena, Oier Lakuntza, Jon Elizetxe, Iñaki Aleman, Aimar Karrika, Saioa Alkaiza eta Joanes Illarregi.

Mariano Izetak (Elizondo, 1915-2001) herri kultura eta bereziki bertsolaritzaren alde egindako lan handia eskertzeko helburua du bere izena daraman sariketak. Lanbidez erloju-konpontzailea zen Izeta, baina horretaz aparte lan itzela egin zuen herri kultura eta ondarea biltzen eta ezagutarazten. Egindako guztiagatik, Baztango seme kuttuna izendatu zuten. Idazle, “Nafar Izkuntza”-ko kolaboratzaile, Euskaltzaindiako kide, Baztango hiztegien egile, mutil-dantzen sustatzaile… hamaika kontutan ibili zen Izeta.

Bertsolaritza izan zen bere zaletasunik handienetakoa. 1936. urtean egin zen lehen Nafarroako Bertsolari Txapelketan lagundu eta hortik aurrera hamaika bertso saio antolatu zituen. Nafarroako Bertsozale Elkarteko ohorezko presidentea zen.

Izeta Sariketak, garai batean jokatzen zen Xalto Sariketa edo iaz abiatutako Bertsokabi Sariketa bezalaxe, Nafarroako bertsolari gazte eta hasiberriei bultzada ematea du xede, plazak eskainiz, haien bertsogintza garatu eta ezagutzera eman dezaten.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun