Zigako Joxean Etxeberria laugarren izan da Euskal Herriko 2. mailako aizkora txapelketan

Joxean Etxeberria bi segundorengatik ez da podiumera igo.

Azaroaren 4an Iurretan (Bizkaia) jokatutako finalean Jesus Mari Mujika suertatu zen txapeldun eta bigarren izandako Luis Mari Txapartegirekin batera igoko da lehen mailara 

Euskal Herriko bigarren mailako aizkolarien finala azaroaren 4an, igande eguerdian jokatu da Iurretako pilotalekuan (Bizkaia). Zigako Joxean Etxeberria iizanda eskualdeko ordezkari bakarra eta laugarren izan da. Jesus Mari Mujika gipuzkoarra suertatu da txapeldun eta bigarren izan den Luis Txapartegirekin batera, maila nagusian lehiatuko da datorren urtean.

 

Aizkolari bakoitzak sei pago-enbor moztu behar zituen: bi kanaerdiko (54 ontzakoak), bi 60 ontzako eta bi oinbiko (72 ontzakoak).  Jesus Mari Mujika ongi nagusitu zen eta 20 minutu eta 43 segundo behar izan zituen lana burutzeko. Bigarren izan zen Luis Txapartegik ia minutu bat gehiago behar izan zuen (21 minutu eta 37 segundo). Podiumeko hirugarren koxkara igotzeko lehian izan zen borrokarik handiena eta azkenean bi segundo eskasengatik  Aratz Mugertza III.a nagusitu zitzaion Joxean Etxeberriari. Mutrikuarrak 22 minutu eta 28 segundo behar izan zituen eta Zigakoak 22 minutu eta 30 segundo. Bosgarren postuan, ez zen urrun ibili Lezaungo Juanjo Lopez (22 minutu eta 46 segundo) eta Arkaitz Jauregi arabarra izan zen seigarren, 23 minutu eta 36 segundoko denborarekin.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun