Lau segundogatik Urrezko Aizkolarien Kopatik kanpo gelditu da Zigako Joxean Etxeberria

Lau segundogatik Urrezko Aizkolarien Kopatik kanpo gelditu da Zigako Joxean Etxeberria
Igandean Pobesen lehian aritu ziren aizkolari eta harri-jasotzaileak.

Kañamares IV.a nagusitu zitzaion igandean Pobesen jokatutako kanporaketan 

Urrezko Aizkolarien Kopako laugarren kanporaketa jokatu zuten urriaren 14an Pobesen (Araba). Zigako Joxean Etxeberriarekin batera, Aroztegiko Oier Kañamares IV.a eta Xabier Zaldua gipuzkoarra aritu ziren nor baino nor gehiago, hamar kanaerdikotara. Probaren zatirik handienean aitzinetik ibili zen Zigakoa, baina azken enborrean, lau segundorengatik irabazi zion Kañamares IV.ak.

 

Oier Kañamaresek 34 minutu eta 20 segundo behar izan zituen proba burutzeko eta Joxean Etxeberriak 34 minutu eta 24 segundo. Dexente beranduago bukatu zuen Xabier Zaldua gipuzkoarrak, 41 minutu eta 19 segundotan. Honela, Kañamares IV.a sailkatu da hurrengo txandarako. 

Harrijasotze txapelketa Kirolbet sariko hirugarren jardunaldia ere jokatu zen Pobesen. Ehuna kiloko hiru harrirekin aritu ziren, hiruna minutuko txandatan. Jon Irañetak 63 jasoaldi eman zituen (26 zilindro zaharrari, 16 kubikoari eta 21 bolari) eta Leitzako Josetxo Urrutiak 62 (28 zilindoari, 16 kubikoari eta 18 bolari). Honela, Irañetak aitzinera egin du eta Urrutiak bertze kanporaketa bat jokatuko beharko du.