Baztango Udalak herri-bazkalekuetan inbertsioak egin ditu

Ttipi-Ttapa 2018ko urr. 17a, 06:30
Larrakarte alderdian hondatutako aska zaharberritu du Udalak, 2.460 euro inbertituz.

Udako hilabeteetan Baztango bazkaleku komunaletan lanak egin ditu Udalak. Erdizko Bihotzeko zilo alderdian adibidez aska bat egin du; horretarako, 1.699 euro inbertitu ditu. Aska hori nekazariek eskatua zuten, urtero bazkaleku komunaletako nekazariekin egiten den bilkuran aipatu zuten. Erdizen ere, Larrakarte alderdian hondatutako aska zaharberritu du Udalak, 2.460 euro inbertituz. Lan guztiak Urballo enpresak egin ditu.

Herri-bazkalekuen moldatze-lanetarako ez ezik, bideak zaharberritzeko ere inbertsioak egin ditu Udalak. Zehazki, Belateko bazkalekutik Donamariara doan bidea ere zaharberritu du Udalak. 1.800 euroko kostua izan du eta Almakok egin du.

Gainerakoan urtero bezala Erdiz, Lizartzu eta Belateko bazkalekuetako sasiak moztu ditu eta bazka hobetu eta indartzeko mineral ekologikoa hedatu du. Bortz urte dira aipatu herri-bazkalekuek ziurtagiri ekologikoa dutela, denetara 1.000 hektarea. 

Aipagarria da, modu berean, hiru herri-bazkaleku horietan urtero 700 behi buru eta 80 betizu alhatzen dituztela. 2.700 ardi buru inguru eta 240 zaldi-behor. Horiek denak 200 nekazarirenak dira.

 

 

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun