erran.eus

Zigako Joxean Etxeberria Euskal Herriko bigarren mailako aizkora txapelketaren finalean izanen da

  Kirola  Baztan  Ziga

Eskualdeko ordezkari bakarra izanen da azaroaren 4an Iurretan, Asier Pellejero eta Oihan Larretxea kanpoan gelditu baitziren

Euskal Herriko bigarren mailako aizkolarien finalerako sei postuak erabakita daude. Orotara 12 aizkolari aritu ziren kanporaketan igande eguerdian Durangon jokatutako kanporaketan. Zigako Joxean Etxeberria azaroaren 4an Iurretan jokatuko den finalean izanen da, ez ordea Asier Pellejero aresoarra eta Oihan Larretxea beratarra.

Zigako Joxean Etxeberria Euskal Herriko bigarren mailako aizkora txapelketaren finalean izanen da
Joxean Etxeberria Euskal Herriko bigarren mailako aizkolari txapelketaren finalean izanen da. | Ikusi handiago | Argazki originala

 

Hiru kana erdiko, 60 ontzakoa eta oinbikoa moztea zen lana, eta onena Lezaungo Juan Jose Lopez beteranoa izan zen. Bere denbora 16 minutu eta 52 segundokoa izan zen. Bigarren Arkaitz Jauregik bukatu zuen (17:16), hirugarren Luis Mari Txapartegik (17:22), laugarren Jesus Mari Mujikak (17:25), bosgarren Aratz Mugerzak (18:00) eta seigarren Zigako Joxean Etxeberriak (18:02). Finaletik kanpo gelditu ziren Oier Kañamares (18:23), Eloy Cortxero (18:24), Asier Pellejero (18:41), Iban Resano (18:51), Oihan Larretxea (19:36) eta Julen Kañamares (21:00). Finala azaroaren 4an, Iurretan jokatuko dute.

  

Urrezko kopa aizkoran eta harri-jasotzen

Igandean jokatu zen Bilbon, Deustun, Eusko Label Saria, Urrezko Aizkolarien Kopako kanporaketa, eta Jon Irazu izan zen garaile: hamar kana erdiko mozteko 29 minutu eta 30 segundo behar izan zuen. Aurkariak, Donato Larretxeak, 33 minutu eta 49 segundo egin zituen. Hala, Irazu hurrengo neurketara pasatu da eta Larretxea kanpoan gelditu da.

Harri jasotzen, Kirolbet Saria tarteko, ekitaldi berri bat jokatu zen eta hiru harri erabili zituzten, bakoitzarekin hiru minutuko txanda. Horrela, Josetxo Urrutia leitzarrak 100 kiloko zilindro zaharrari 29 jasoaldi eman zizkion, pisu bereko kubikoari 16, eta 19 jasoaldi ehuneko borobilari. Bere aurkariak, Xabat Olaizolak, 27, 17 eta 18 hurrenez hurren, guztira bi gutxiago, 62 jasoaldi.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa