erran.eus

Tokiko elikadura kontseilua sortzeko erabakia hartu du Baztango Udalak

  Gizartea  Baztan

EH Bilduren proposamena aho batez onartu zuten ereiaroaren 27ko osoko bilkuran

Ereiaroaren 27a egindako bilkuran Baztango Udalak tokiko elikadura kontseilua osatzeko EH Bilduren proposamena aho batez onartu zuen. Elikadura kontseilua tokiko elikadura sisteman parte hartzen duten eragileen bilgunea izanen da, elikaduraren alderdi soziala, ekonomikoa eta ingurugiro aldekoak kontuan hartuz. Modu berean,  tokiko elikadura sistema bulkatzeko ekimenak sustatuko ditu, elikadura sistema iraunkorra eta sozialki bidezkoren bidez tokiko ekonomiaren garapena bulkatzeko. Bidenabar, tokiko elikadura sistemari buruzko informazioa bildu, sintetizatu eta elkarbanatuko du.

Tokiko elikadura kontseilua sortzeko erabakia hartu du Baztango Udalak
Baztango Zaporeak elkartearen aurkezpena. Baztanen egiten ari diren lanaren erakusgarrietako bat. | Ikusi handiago | Argazki originala

 

Aipatu kontseilua osatzeko proposamena, Baztanen egiten ari denari batasuna emateko beharrak sorturik heldu da. Izan ere, elikaduraren ikuspegi sistemikotik azkeneko urteetan eragile desberdinak gauza desberdin aunitz egiten ari baitira Baztanen: komunalak kudeatzeko ordenantza berria, hiltegiko zatitzeko gela, nekazal azpiegitura desberdinak, udaberriko feriaren sasoiko lehen gasnaren mozketa, haur eskolako sukalderako baldintza berriak, Baztango eskoletako jangeletako azterketa, “Zer jan, halako Baztan” kanpaina, Baztango agroekologia eskola herritarraren egitarau zabala, Baztango Zaporeak-en sorrera, Elbeteko ostatuak erdietsitako slow food saria eta bertako gasnagileek eskuratutakoak, elikagai-bankua, etxez etxeko otordu zerbitzua, Iruritako baratze hezitzailea, Baztandarren Biltzarreko bazkarian bertako aratxea zerbitzatzea… Zerrenda luzea izanda, Baztanen egiten diren jarduera desberdinak bateratzeko, ikuspegi sistemikoa lantzeko eta elikaduraren gaiak bailarako garapen sozioekonomiko eta soziokulturalean duen garrantzia erakusteko, tokiko elikadura sistema landuz ekonomia eta enplegua, osasuna eta ingurugiroa, kohesio soziala e.a. lantzeko asmoarekin sortuko da kontseilua. 

Kontseiluan udaleko ordezkari politiko eta teknikoetaz gain, Baztango eragile sindikal eta sozialean parte hartze zabala aurrikusten da.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa