Garagardoa egiten ikasteko ikastaroa ortziralean dastaketarekin akituko dute Baztanen

Ttipi-Ttapa 2018ko eka. 28a, 10:33
Sei lagunek parte hartu dute ikastaroan eta egindako garagardoa dastatuko dute orai.

Arizkungo Gamioxarrean izanen dute hitzordua, afari baten inguruan 

Baztango Agroekologia Eskola Herritarraren barnean garagardoa egiteko ikastaroa egin dute Arizkungo Gamioxarrean. Azkeneko hitzordua ekainaren 29an izanen dute, eta egindako garagardoa dastatzeko aukera izanen dute, ortziralean, afari baten inguruan.

 

Elizondoko Aise elkartean sortutako Aparjei garagardogileak taldeko kideek ikasitakoa bertaratutakoekin elkarbanatu zuten lehenik ekainaren 1ean. Horrela, maltarekin egiten den Belgian pale ale garagardoaren azalpenak eman zituzten: malta ur beroan beratu, orantza eman, otsaihen edo lupuloarekin irakin, hoztu, hartzitzeko ontziratu…  Behin ontziraturik aste batez hartzitzen utzi zuten eta ondoko ortziralean garagardoa botilaratu zuten ekainaren 8an. Hiru asteren ondotik, botila horietan ondu den garagardoa probatuko dute ortzirale arratsean Gamioxarrean, afari batean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun