«Bestetan arratsaldeak girotzeko gautxorion ahalegina behar dugu»

Ttipi-Ttapa 2018ko eka. 19a, 06:40
Jon Iriarte, Arizkungo bestetako antolaketa lanetan ari da aurten.

Jon IRIARTE , Arizkungo gaztea

Herriko bestez gozatu ahal izateko lan handia egin behar izaten dute Arizkungo gazteek. Antolaketa-lan nagusiak. «urtez urte aldatzen diren lau damunagusien esku» uzten badira ere, generalean, «handik eta hemendik egiten diren ekarpenez» osatzen dute egitaraua. Aurtengoan ez dira guti Jon Iriarteren egitekoak, bertze hiru lagunekin batera, «Sanjuanak behar bezala pasatzeko adi egon eta behar denean lagunduz» ibili beharko du. 

 

Lana eta besta uztartuz

Lanak lan eta ardurak ardura, bestak «gogo aunitzekin» bizi ditu Iriartek. Zopa jatea, suak, Arizkun Rock, zikiroa… herrian urtean behin izaten direnez, «egunei ahal bezainbertzeko etekina ateratzen» saiatzen da. Berriki arte «egunik gogokoena zopa jate eguna izan da» eta «suak saltatzea arizkundarrok galdu ezin dugun hitzordua da». Baina azken urteetan Arizkun Rock jaialdiak hartu duen «indarra» tarteko, ez luke bat aukeratzen jakinen. Kontzertuak 2006tik antolatzen badira ere, Arizkun Rock izenez laugarren urtea dute eta «urtetik urtera jende gehiago bertaratzen da, joan den urtean plaza gainezka zegoen, inoiz ez bezala». Hitz guttitan, «herriaren lan gogorrez eta batez ere gazteen izerdiz aitzinera ateratzen dugun jaialdia da, musika onaz inguruko jendearekin gozatzeko aitzakia bikaina».

Arizkungo bestei «egun batzuetan arratsaldeak girotzea falta zaiela» uste badu ere, «dena behar bezala lotzea eta ekitaldi guztiak arrakastatsuak izatea ez da dirudien bezain aise lortzen». Hori horrela, Iriartek «gaueko musika eta giroa» nabarmentzen dela uste du: «jende gehiago animatzen da eta musika lagun, giroa ederra izaten da». Eguneko giroari bultzadatxoa emateko eta gaueko martxari eusteko gonbidapena egin nahi izan du arizkundar gazteak: «udari bestan hastea bezalakorik ez dagoelako, San juanetan egin kuku eta Sanpedrotan ez gelditu mutu».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun