Bigarren aldiz debuta eginen du Gorka Urtasun iruritarrak erremonte profesionalean

Bigarren aldiz debuta eginen du Gorka Urtasun iruritarrak erremonte profesionalean
Iruritako Gorka Urtasun, duela urte batzuk Urrizaren kontrako partida batean. Hiru urteko geldialdiaren ondotik, berriz erremontera itzuliko da.

Hiru urteko geldialdiaren ondotik, seguruenik bihar aurkeztuko den Nafarroako erremonte txapelketan hasiko da

Duela hiru urte utzi zuen Gorka Urtasun Saldiasek (Irurita, 1986ko maiatzaren 11) erremonte profesionala. Tarte honetan, bertze lanetan aritu da, baina kirola erabat alde batera utzi gabe, mendiko lasterketetan edo laxoa txapelketan aritu baita, bertzeak bertze. Orain, berriz ere erremonteara bueltatuko da eta bihar Isaban aurkeztuko den Nafarroako XIII Erremonte txapelketan aritzeko da. Oriamendi 2010 enpresaren programetan hasiko da abudo.

 

Koteto Ezkurrak erremontea utziko duela iragarri berritan, erremontearen munduan baikor hartu dute Urtasunen itzulera. Inor ezin daiteke Ezkurrarekin konparatu, baina Urtasunek erremontea utzi zuenean, aurrelarien artean onenen artean zegoen, batez ere frontoi laburrean. Horren erakusgarri, Labriten jokatu zituen Eguberrietako buruz buruko lau txapelketak irabazi zituen. Duela hilabete batzuk, Erremonte Fundazioarekin harremanean jarri zen Iruritako aurrelari bizia eta itzultzeko ateak ireki zizkioten. Oriamendi 2010 enpresarekin lanean hasi zen, itzultzeko entrenamentuak egiten. Oinarrizko prestaketa fisiko bikaina dauka Urtasunek eta entrenamentuetan jokoz ere ongi dabilera erakutsi du, beraz, pentsatzekoa da berriz ere erremonte zaleak gustura utziko dituela bere jokuarekin.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun